28. okt. 2002
Ég hóstaði svo mikið í nótt að
ég gubbaði þannig að ég fæ ekki heldur að fara út í dag. Ég var að
dunda mér með perlur í dag, ég bjó til sjúkrabíl og kranabíl úr þeim,
svo las amma fyrir mig sögu en mér finnst svo gaman að láta lesa fyrir mig.
Hún er líka að kenna mér að lesa. Mér finnst miklu skemmtilegra að læra
að skrifa. Ég hef það hlutverk að leggja á borð fyrir kvöldmatinn og
það finnst mér gaman og enn skemmtilegra þykir mér að setja diskana í
uppþvottavélina.
29. okt. 2002
Ég vaknaði seint í dag, afi var
farinn í vinnuna áður en ég vaknaði. Ég hjálpaði ömmu að hengja
þvottinn á snúruna síðan fórum við á leikvöllinn sem er hérna rétt
hjá, hann er skemmtilegur en ekki eins skemmtilegur og þar sem rörarenni-
brautin er. Kvöldsagan í kvöld er Mjallhvít og dvergarnir sjö og amma
sofnaði ekkert á meðan hún var að lesa.
30. okt. 2002
Ég vaknaði snemma í morgun. Afi
sagði að ég hafi dottið úr rúminu í nótt en ég man ekkert eftir því.
Þegar afi var farinn í vinnuna horfði ég á barnaefni í sjónvarpinu fram
á hádegi en þá fórum við amma í stóra dótabúð. Ég mátti kaupa mér
dót fyrir pening sem amma gaf mér því ég er búin að vera svo góður og
þægur. Þegar við komum heim lék ég mér með nýja dótið sem er bíll og
bílskúr svo fór ég að æfa mig að skrifa og Atli Már hjálpaði mér á
meðan amma var að tala í síman og elda matinn. Eftir matinn fór ég í
Bubba byggir og síðan að sofa eftir að amma las fyrir mig sögu.
31. okt. 2002
Ég vaknaði kl. 10. Fékk mér
þá jógúrt, brauð og kornflex. Þegar ég var búin að borða æfði ég
mig í að skrifa því það er svo skemmtilegt. Svo tók bílaleikur við og
sjónvarpið fram að hádegi. Þá fórum við amma í labbitúr. Um kl. 3
þegar Atli Már var búinn að vinna fórum við að versla fyrir helgina.
Þegar við komum heim fór ég í tölvunna með Atla Má. Kvöldsagan í
kvöld var Geiturnar þrjár.
1. nóv. 2002
Við
afi sváfum út í dag og vöknuðum ekki fyrr en kl. 11. Afi þurfti ekki að
fara að vinna í dag því það er frídagur í Þýskalandi. Eftir hádegi
fórum við afi út að hjóla. Við hjóluðum á leikvelli og út á flugvöll
að sjá allar flugvélarnar fara á loft, það þótti mér gaman. Við komum
líka við í bakaríinu og keyptum sultubollu. Þegar ég kom heim æfði ég
mig í að teikna og skrifa og horfði á teiknimyndir. Eftir kvöldmat vorum
við Atli Már að fíflast svolítið og afi líka. Síðan las Atli Már fyrir
mig söguna um Öskubusku og ég fór að sofa því mig hlakkar svo til að
vakna á morgun því þá er nammidagur.
2. nóv. 2002
Loksins
er komin nammidagur. Þegar ég var búinn að borða morgunmat mátti ég fara
í skúffuna og fá mér nammi. Síðan fór ég með afa og ömmu út að
hjóla. Fyrst hjóluðum við í Hofgarten þar sem rörarennibrautin er og
vorum þar lengi, þá hjóluðum við niður að Rín og fengum okkur pulsu
því ég og afi vorum svangir. Þegar við vorum búnir að borða hjóluðum
við meðfram Rín áleiðis heim, ég var orðinn svolítið þreyttur þannig
að ég fékk mér smá kríu á leiðinni. Mig langaði að fara aftur á
róló svo við komum við á einum enn. Þar fannst mér voða gaman nema það
var kóngulóarvefur á klifurgrindinni. Við vorum komin heim um fimm leytið
því þá er farið að dimma og svo ætlaði afi að fara á tónleika. Við
amma dunduðum okkur saman um kvöldið og horfðum á sjónvarpið. Ég mátti
fara seint að sofa af því að það er laugardagur.
3. nóv. 2002
Ég
vaknaði seint í dag af því ég fékk að vaka svo lengi í gær. Við fórum
ekkert út í dag fyrr en eftir hádegi en þá fórum við afi út að hjóla
meðan amma var að rembast við að koma heimasíðunni minni á netið, hún
er svo mikill klaufi við það. Við afi fórum á róló, þar var gaman. Ég
var að sulla í drullupolli og varð alveg rennandi blautur samt var ég í
stígvélum og pollagalla. Ömmu finnst ég hafi stækkað síðan ég kom til
Þýskalands, hún mældi mig og er ég orðin 103 cm og 17 kg. Ég fór í
fýlu við ömmu af því ég fékk ekki eftirrétt því hann er uppáhaldið
mitt, hún segir að fyrst þurfi maður að borða allan matinn. Hún setti
fýlukarlinn í gluggan og þá fór ég í ennþá meiri fýlu og skreið upp
í rúm og sofnaði. Ég vaknaði aftur kl 23 til að setja broskarlinn í
gluggann (það má ég gera sjálfur þegar ég er hættur í fýlu) ég fór
svo aftur upp í rúm að sofa (á millunni hjá afa og ömmu).